Хөрмәтле укучыларыбыз!

Үзәк китапханәнең милли-әдәбият бүлеге яңа китаплар тәкъдим итә

 Проза әсәрләрен яратучыларга:

Абдуллин, Ф. А. Чүл бүресе: повестьлар, хикәяләр/ Фәтхулла Абдуллин. – Казан: Татар. кит. нәшр., 2015. – 127 б.

Язучының бу китабында хатын-кыз образлары калку итеп сурәтләнә. Аларның тормышта адым саен очраган авырлыкларга бирешмәве, көтелмәгән явызлыклар каршында да югалып калмаулары, Кеше һәм Ана дигән бөек исемне югары тотулары тасвирлана.

Вәлиев, Р. И. Мәхәббәт һәм нәфрәт: шигырьләр, повестьлар, истәлекләр = Любовь и ненависть: стихи, повести, воспоминания/ Разил Вәлиев. – Казан: Татар. кит.нәшр., 2015. – 543 б.

Бу китапка Татарстан Республикасының халык шагыйре Разил Вәлиевнең төрле елларда иҗат ителгән шигырьләре, повесть һәм мәшһүр шәхесләр турындагы истәлек-язмалары кергән. Әсәрләр татар һәм рус телләрендә тәкъдим ителә.

  Гарипова, Т. Х. Асыл ташлы муенса: роман, повесть, хикәяләр/ Таңчулпан Гарипова; [башкортчадан И. Ногманов тәрҗ.]. – Казан: Татар. кит. нәшр., 2015. – 320 б.

Башкортстанның Салават Юлаев исемендәге Дәүләт премиясе лауреаты Таңчулпан Гарипованың китабына төрле елларда язылган роман, повесть һәм хикәяләре тупланган. Әлеге әсәрләрдә фаҗигале, гыйбрәтле кеше язмышлары белән таныша аласыз.

 Дәрзаман, Җ. Х. Җиләкле көннәр: повестьлар/ Җәүдәт Дәрзаман. – Казан: Татар. кит. нәшр., 2015. – 207б.

Танылган балалар язучысы Җәүдәт Дәрзаманның бу китабына ике повесте туплап бирелгән. “Җиләкле көннәр”дә авыл баласының беренче садә, самими мәхәббәте, ә “Бизмән йолдызлыгы” дигән маҗаралы повестендә укучыга кызыклы гаҗәеп хәлләр, вакыйгалар тасвирлана.

 Исхаков, Ә. Г. Чишмәләр иле – игеннәр иле: документаль-публицистик язмалар, мәкаләләр, шигырьләр/ Әнәс Исхаков. – Казан: Татар. кит. нәшр., 2015. – 255 б., рәс. б-н.

Озак еллар Азнакай районы һәм шәһәре башлыгы булып торган шагыйрь Әнәс Исхаков бу китабында үзе белән бергә данлыклы хезмәт юлы үткән хезмәттәшләренең, остазларының, шулай ук гади колхозчылар һәм эшчеләренең, эшмәкәрләр һәм сәнгать әһелләренең дә чын асылын ачып бирә алган.

 Кәрами, Р. К. Кая чабасың, гомер юртагы?: роман/ Рәфкать Кәрами. – Казан: Татар: кит. нәшр., 2015. – 383 б.

Бу роман – “Олы юл да сикәлтәле” исемле трилогиянең өченче кисәге. Беренчесе белән 2007 елда, икенчесе (“Сөеп туймас чакларың”) 2011 елда дөнья күргән иде. Роман гыйбрәтле хәлләргә, мәхәббәт маҗараларына, тормыш-яшәеш хакында уйлануларга, четерекле вакыйгаларга бай.

 Кәримов, К. Ә. Карурманда кара песи: повестьлар һәм хикәяләр/ Камил Кәримов. – Казан: Татар. кит. нәшр., 2015. – 207 б.

Китапка язучының төрле елларда иҗат ителгән повестьлары һәм хикәяләре туплап бирелгән.

Мансуров, А. И. Мәхәббәт әкияте: хикәяләр/ Алмаз Мансуров; [ кереш сүз авт. Ф. Мөслимова]. – Казан: Татар. кит. нәшр., 2015. – 111 б.

Яшь язучы Алмаз Мансуровның әлеге беренче китабына яшьлек һәм мәхәббәт хисләре белән өртелгән, хыял-уйны яктылыкка тоташтырырга сәләтле хикәяләре тупланган.

 Нуруллин, В. Н. Ул яшәргә тиеш иде: повестьлар/ Вакыйф Нуруллин. – Казан: Татар. кит. нәшр., 2015. – 400 б.

Әлеге китапка язучының төрле елларда язылган һәм укучылар тарафыннан яратып кабул ителгән “Күпер чыкканда”, “Һәлакәт”, “Ике урам арасы”, “Ул яшәргә тиш иде” дигән повестьлары туплап бирелгән.

 Садриев, Ф. М. Дәверләр аһәңе: повестьләр һәм хикәяләр/ Фоат Садриев. – Казан: Татар. кит. нәшр., 2015. – 439 б.

Бу китапка Татарстанның халык язучысы, Габдулла Тукай исемендәге Дәүләт бүләге иясе Ф. Садриевның төрле елларда иҗат ителгән иң яхшы повестьләре, хикәяләре туплап бирелгән. Әдипнең күпчелек әсәрләрендә бүгенге авыл тормышы, аның җиргә тугры кешеләре дулкынландыргыч вакыйгаларда сурәтләнә.

 Хәсәнов, Ә. Х. Бәхет кайда оя кора: роман, хикәяләр/ Әнәс Хәсәнов. – Казан: Татар. кит. нәшр., 2015. – 319 б.

Язучының бу романында яшь замандашларыбызның илебездәге үзгәрешләр чорында бәхеткә омтылулары, эзләнү, хаталары, югалту-табышлары аша тормышта үз урыннарын табулары тасвирлана.

 Яһудин, М. Н. Тормыш бу...: документаль-публицистик бәян, хикәяләр/Марс Яһудин; [ кереш сүз авт. Р. Бәшәр]. – Казан: Татар. кит. нәшр., 2015. – 239 б.

Язучының документаль-публицистик бәяны әтисе, язучы-фронтовик Нәфикъ Яһудин турында. Автор, әтисенең әсәрләрен, фронт көндәлекләрен, сугыштан язган хатларын эзлекле тәртиптә урнаштырып, төп геройларның тормыш юлын тулаем күзалларга мөмкинлек тудыра.

Шигырьләр яратучы укучыларыбызга:

Җамалетдинова, Ф. И. Җирбизәк: Шигырьләр/ Фирүзә Җамалетдинова. – Казан: Татар. кит. нәшр., 2015. – 367 б.

Милләт язмышы, Кешелек дөньясының гамъ-борчуларын чагылдырган шигырьләр белән беррәттән, авторның мәхәббәт лирикасы да укучылар тарафыннан җылы кабул ителер дип ышанабыз.

 Камалов, Н. З. Мин синең улың, Мәңгелек!: шигырьләр, поэмалар, җырлар/ Нариман Камалов. – Казан: Татар. кит. нәшр., 2015. – 255 б.

Популяр җырлар авторы буларак таныш Нариман Камаловның бу китабына җырлары белән бергә төрле елларда иҗат ителгән шигырь-поэмалары бирелгән.

Нәгыймуллина, Д. Н. Галәм агачының яфрагы мин: шигырьләр/ Дания Нәгыймуллина; [кереш сүз авт. Р. Зәйдулла ]. – Казан: Татар. кит.нәшр., 2015. – 127 б.

Яшь шагыйрә беренче китабында лирик әсәрләрен тәкъдим итә. Аның тормыш-яшәеш турында уйланып язылган шигырьләре дә, мәхәббәт лирикасы да укучыга яшь замандашыбызның уйлы-гамьле күңел авазын ирештерә.

Солтанов, О. С. Йолдызлы төннәр: шигырьләр/ Омар Солтанов; [ проект җит. һәм кит. төз., кереш сүз авт. Л. Шәех; кыргызчадан Л. Шәех һ. б. тәрҗ.]. – Казан: Татар. кит. нәшр., 2015. – 95 б. – (“Төрки әдәбият” сериясе).

“Төрки әдәбият” сериясеннән дөнья күргән беренче китапта совет һәм төрки әдәбият классигы, Кыргызстан Республикасының халык шагыйре Омор Солтановның төрле елларда язылган шигырьләре татар теленә тәрҗемәдә тәкъдим ителә.

 Хөрмәтле әти –әниләр һәм тәрбиячеләргә:

Нәниләргә бишек җырлары, бармак уеннары: ике яшькә кадәрге балалар өчен / [төз. Лилия Дәүләтшина; рәссамы Миләүшә Вазиева]. – Казан: Татар. кит. нәшр., 2015. – 31 б.: рәс.б-н.

Җыентыкта нәниләргә халкыбызның бишек җырлары, теләк – юраулары, бармак уеннары тупланган. Китап балаларның яшь үзенчәлекләрен исәпкә алып төзелгән һәм ата – аналарга, балалар бакчалары тәрбиячеләренә тәкъдим ителә.

Шиһабиева, М. Г. Әвәләп ясыйм: әти – әниләргә һәм тәрбиячеләргә ике – өч яшьлек балалар белән эшләү өчен методик ярдәмлек/ Миләүшә Шиһабиева, Гүзәл Зиннәтова; [ идея һәм проект авт. Т. Р. Шакирова; фәнни җит. К. В. Закирова; рәссамы В. В. Семенова]. – Казан: Татар. кит, нәшр., 2015. – 40 б. : рәс. б-н. – (“Уйный – уйный өйрәнәм” сериясе).

Әлеге китапта эчтәлекләре буенча бер-берсенә бәйле һәм баланың иҗади үсешенә уңай тәэсир итә торган егерме әвәләп ясау шөгыле тәкъдим ителә. Шөгыльләрнең төп геройлары - нәни куян балалары (Шаян белән Наян).

Мәктәпкәчә һәм кече яшьтәге мәктәп балаларына:

 Батуллин, Р. М. Аю баласы Әппәс: нәниләр өчен әкият/ Рабит Батулла; [рәссамы Лилия Золондинова]. – Казан: Татар. кит. нәшр., 2015. – 20 б. : рәс. һәм тышл. б-н.

Урманда яшәүче Әппәс исемле бәләкәй аю баласы белән танышу нәни укучыларыбызга кызыклы булыр.

 Мәрданова, Ф. Г. Без ясаган кар бабай: балалар өчен шигырьләр/ Флера Мәрданова; [ рәссамы Фаил Исламов]. – Казан: Татар. кит.нәшр., 2015.- 16 б.: рәс. б-н.

Әдәби – нәфис басмада Флера Мәрданованың балалар өчен язылган шигырьләре белән таныша аласыз.